L-Awtorità ta' Standards ta' Ħarsien Soċjali twaqqfet bl-Att Nru XV tal-2018 tal-Liġijiet ta' Malta, li jagħti lill-Awtorità l-awtonomija li tirregola u tissorvelja s-settur tal-wens soċjali f'Malta u Għawdex.
Fl-SCSA, aħna napprezzaw id-djalogu u l-kollaborazzjoni mal-partijiet interessati kollha peress li nemmnu li l-ogħla prijorità ta' kull min hu involut hija l-benesseri tal-membri vulnerabbli tas-soċjetà tagħna.
L-għan tal-Awtorità ta' Standards ta' Ħarsien Soċjali huwa li tiggwida u tirregola l-provdituri ta' servizzi ta' wens soċjali, filwaqt li tiżgura li d-drittijiet tal-utenti tas-servizz jiġu rispettati u li l-vuċi tagħhom tinstema'. L-SCSA tilliċenzja lill-persuni jew l-entitajiet kollha li jixtiequ joperaw servizz li jaqa' taħt is-settur tal-wens soċjali u tissorveljahom biex tiżgura li joffru servizzi li jissodisfaw ir-rekwiżiti stabbiliti mill-Awtorità.
L-Awtorità tirregola servizzi għal persuni b'diżabilitajiet, tfal f'ħarsien alternattiv, servizzi għal persuni bi problemi relatati mal-abbuż ta' sustanzi u vizzji oħra, servizzi offruti minn xelter u servizzi fil-komunità. Is-servizzi li tirregola l-Awtorità jvarjaw ukoll fin-natura tagħhom, li jvarjaw minn servizzi residenzjali u ċentri ta' matul il-jum għal servizzi offruti mill-uffiċċju.
